離辭職還有 270 - 261日

 離辭職還有270日。

教人攰過自己落手做。

-

離辭職還有269日。

今日又去咗公司附近嘅一間餐廳食晏，老闆個仔已經換返校服嚟幫手，冇再著佢放假嗰陣嘅潮衫潮褲，突然諗起佢下次放暑假嘅時候我已經遞咗信等緊走人。

人一生會放嘅暑假唔多，以前返親學就諗住幾時暑假，返咗全職之後就成日諗住幾時放長假去旅行，心境已經唔同但呢份期待我覺得係極為相似。

中學畢業讀ASSO嗰陣暑假好精彩，每日都可以同人打交，打完交去食飯，食完飯去瞓，瞓完再打機，其實我就係要呢啲咋嘛。

-

離辭職還有268日。

湊住一個傻閪返工有如做負重運動。

-

離辭職還有267日。

好想快啲放暑假。

-

離辭職還有266日。

無論咩天氣都要返工～我最鍾意返工～

今日收工差啲趕唔切車添。

-

離辭職還有265日。

真係覺得我同事如過到probation我會喺三個月內痴線，所以考慮緊早啲走。另一個新同事已經玩殘緊我，我感覺自己一直俾佢哋玩殘緊我條賤命。

合作過嘅freelance嗰邊又搵我，好感恩，我真係會當係對我能力嘅一種肯定，多謝。

-

離辭職還有264日。

一大班人一齊做嘢，有時有啲嘢甩好正常，但當一樣小事一直甩一直甩，佢就會變一件大事，到時再追究起上嚟都好難。由一開始就做好一件小事，就可以大大減少出現問題嘅機會，咁點解要等出事再反省咁反智？

公司年年都會換vendor，一年換得柒過一年，而家呢個vendor叫親佢整嘢就又唉又西，一係就拖到2046話訂緊零件整，完全唔知佢作為一個vendor有過乜嘢實質作用。

呢期我壓力真係好大，大到我覺得好難受，生理上接受唔到，平時好日都唔飲酒前幾日一有機會就痴線式飲酒放鬆。有機會提前三個月辭職，拎埋bonus就走人，再咁樣做落去我真係驚自己會痴撚線，如果真係提前三個月走人嘅話，我離辭職只係差172日。

-

離辭職還有263日。

喺一份閪工入面耍小心機上位嘅人我一律覺得係戇鳩，你爭完一輪冇實際升你職或者加你人工嘅話，咁你晒成擔心機爭嚟做乜...？

-

離辭職還有262日。

今日去咗Sugar Ma Ma食心太軟，我真係一路都好鍾意佢哋嘅心太軟，老細俾我感覺係佢真係好執著要將心太軟做好，佢marketing功力未必好高，但佢對心太軟係真愛，不過呢間我真係鍾意去屯門店多過元朗店，因為我鍾意坐喺度食多啲。好鍾意呢類對食物好真誠嘅人，自問食過算好多甜品，我覺得甜品係餵飼心嘅食物，同正餐唔同，人類唔食甜品都可以生存，食甜品係件開心嘅事、幸福嘅事，粗製濫造嘅甜品其實好明顯感覺得出。

-

離辭職還有261日。

第二條team同事幾時可以學識有交帶？