（元朗）光榮冰室
晏就去咗光榮冰室 佢喺元朗開咗咁耐我都未食過 本身係因為想食佢啲煎蛋飯先去 但我坐低見到常餐有得跟西班牙奄列 好似好好食 就忘記咗煎蛋 佢個西班牙奄列其實就係奄列入面放啲腸仔同茄汁豆 有冇人明鍾意食茄汁豆嘅人食呢個奄列有多高興 塊油多唔使講啦 雖然我擺咗陣先食 加上塊包有一定厚度 佢已經冇咁脆口 但麵包加溶晒嘅牛油 你教我佢可以點輸 去到茶餐廳食麵我一定係食公仔麵 餸就五香肉丁同沙嗲牛肉二揀一 今日食呢個沙嗲牛肉公仔麵幾高質 麵底冇煮過龍發到豬頭咁 沙嗲夠香夠濃 收貨 凍檸茶就係正常凍檸茶 成日聽人講呢間光榮啲伙記西到冇人有 今日去又唔覺有特別西 就 正正常常囉 地址：元朗教育路44 46及50號兆明樓B舖 Google Map： 㩒呢度
