（佐敦）澳洲牛奶公司

千呼萬喚始出來嘅一篇，又解鎖一間網上話遊客必食既餐廳，就係我覺得自己一定要食一次嘅澳洲牛奶公司。

睇咗咁多年高登篇澳牛潮文，2025年7月28日，我收工去咗澳洲牛奶公司食早餐。

喺出面等咗一陣就入得，食之前我以為係因為純粹係大家未起身食嘢，食完之後我諗佢單純係好快就做完一個客生意。

同一對情侶、一位西裝男士搭枱。情侶係遊客，西裝男個款似準備出去見客，我係啱啱收工睇落就嚟往生既打工仔，三個人睇落好唔同，但大家喺澳牛嘅早餐時段都係平等，我地幾個之間唯一嘅分別可能就係要煎蛋定炒蛋同埋飲乜嘢。

澳牛職員嘅效率係好唔講得笑，好耐冇見過一間餐廳入面係所有人都高速移動。

我嘅閱卷時間大約有20到30秒左右，光速落單，嗌咗一個早餐跟炒蛋，食完嗌埋杯凍奶茶，加多碗燉蛋。

光速上菜，佢上嘢嗰陣太快我睇唔清，餐具睇落濕濕哋我仲勁柒咁問西裝哥仔份餐具係我定佢嘅。

通心粉就都係嗰味啦，但佢炒蛋我真係好鍾意，夠滑又好重牛油味，本身以為大家吹大咗但真係好好食。燉奶有啲失色，本身expect佢叫澳洲牛奶公司手嘢應該好唔錯，奶味唔重加埋過甜，不給過不給過，反而佢奶茶幾好飲、茶底夠香。雖然所有嘢都光速 但伙記全部都幾nice

地址：佐敦白加士街47號

Google Map㩒呢度