福岡遊記之行程規劃

準備出發

最近壓力真係大到有氣都冇命抖，襯住有少少空閒時間就去福岡清埋啲假。本身諗住去埋浸溫泉但似乎會撞到正，所以忍痛取消。

點解揀福岡呢？其實我本來想去沖繩但礙於冇人同我一齊玩水上活動覺得唔太方便，而東京大阪我下年會同朋友去，所以就決定去福岡，因為我覺得佢同我好啱vibe。

九月幾嘅時候已經買咗UO機票11月12嘅朝早7點45分去，16號晏就4點05分返嚟，價錢係2530hkd。我同我朋友成日話我哋發咗達之後唔會再搭UO，可惜我而家都未發達所以我都係搭UO搭得好開心。

上網成日睇到人住膠囊酒店，所以我心思思都想試吓，於是第一晚就book咗博多嘅First Cabin，

一般入住時間係下午5點，加咗1000yen早兩個鐘check in，總共盛惠266hkd。睇佢網站嘅圖四四正正，希望去到都係咁。

之後兩晚會住博多綠色酒店1號館，因為佢睇圖幾乾淨企理，位置又幾方便，加埋1448hkd兩晚，呢間下午1點已經可以check in，超方便。

15號朝早會好早出發去八女參觀茶園，再去田主丸睇河童相關嘅嘢，之後返久留米住綠富酒店，差唔多620hkd一晚。

未計住宿稅之類，住宿加酒店暫時用咗4864hkd。

呢次我主要想食吓甜品、參觀吓神社同埋睇吓自然風光，食甜品嘅行程應該會喺頭兩日俾我光速KO。

以往去旅行都會帶玩具同遊，今次會帶雪條先生，佢前嗰排斷咗手，希望出發之前駁得返。